Elini giughet una retzividade turìstica pitica, modu de nàrrere albergos e hotel, ma sa bidda in is meses de istade, b'est sa collida de una bella presèntzia de turistas chi est creschende annu cun annu. S'ospitalidade de sa gente, sa paghe de sa bidda, comente est posta a mesu tretu intre mare e monte faghet a manera chi is istràngios chi iscansant a bidda de abisita a is amigos, in apartamentos o in domos in arrendu, abbarrant ispantados e bi cherent torrare a bènnere in is annos imbenientes, o ddu consìgiant a is amigos issoro. In is ùrtimos annos est naschende cosa de importu peri in contu de collida turìstica, bi tenent duos 'Bed and breakfast', e est creschende su disponimentu de domos o apartamentos de arrendare. In Su Cramu dae calincunu annu b'est unu Ristorante Bar Pitzeria, chi in s'istade bi si podet testare totu is ispetzialidades de sa coghina sarda, dae s'antipastu de presutu a is culurgiones, a sa petza a orrostu, a su binu de bidda. Semper in intro de su parcu b'est un'àrea in ue faghet a fàghere ispuntinos e pichetadas sètzidos in mesas de granitu, in ue is grefas si cuncordant is ispuntinos in sa friscura a suta de is èlighes. Su parcu de su Cramu a prus de ofèrrere su friscu e una bista de sa marina de Arbatassa, Lotzorai, Gelisuli, S. M. Navarresa, est unu logu de alabantza, in ue b'est sa crèsia intregada a Nostra Sennora (o Madonna) de su Cramu, chi dd'afestant a giru de su 15 de mese de argiolas.