Torrade a sa primu pàgina
Su Treninu Birde
Elini est una de is pagas biddas chi tenent s'istatzione de su trenu a intro de bidda, intre su bighinadu de Funtanedda e su Fossu. Pro more de custa resone, s'istòria de Elini est meda acapiada a sa de su trenu. Finas a su 1997 bi fiant is lìneas ordinàrias, ma imoe sa lìnea est petzi cussa turìstica-ambientale de su Treninu Birde. Sa ferrovia dd'aiant istèrrida intre su 1886 e su 1894, a pustis de chèscias e avolotos de is populatziones ogiastrinas, chi si bidiant foras dae is tràficos de mercantzias e de bideas. Tando furcadu aiant sa lìnea Casteddu-Sòrgono in Mandas, e dae cue seghende bia de su Sarcidanu e sa Barbàgia de Seulo aiant gheretzadu a sa badde de s'Isara e dae cue in pitzu de Biddamanna finas a nde barigare su monte faghende a Lanusè e tando a Elini. S'ùrtima istatzione est Tortoilì in su portu de Arbatassa. Medas elinesos aiant donadu una manu de agiudu pro cumprirent s'òpera, ispecializande•si puru. Eris sa ferrovia nde batiat gente, bideas, amostraiat comente podiat èssere su mundu aterue; oe abbarrat comente ispera pro unu turismu liadu a su territòriu e a sa bellesa e s'incantu de un'esperièntzia de tempos antigos.
