|
Is resones chi ant batidu a si giùnghere is duas biddas non sunt craros meda. Fortzis sa Comuna de Elini non faghiat prus a si amantènnere. Unu rapresentante de sa bidda pigaiat parte a is setziadas de sa Comuna e a is atobiadas locales prus mannas.
In su 1959 sa biddighedda torrat a a si cunchistare s'indipendèntzia. Su primu sìndigu elinesu de su pusti-gherra fiat istadu Austinu Mulas. Unu grandu òmine de sa polìtica elinesa, a issu sa merèssida de cudda atzione de re-nàschida chi sa bidda at traessadu e est traessende.
In Ogiastra in is annos de sa prima gherra
mundiale (Sa Gherra Manna) torrat a crèschere su tisicore chi in paris a sa malàrica e a s'"ispanniola" aiant cajonadu medas mortes intre is elinesos. Intre is resones de s'ispainamentu de custas maladias bi fiat, sena duda peruna, una situatzione sòtziu-sanitària lègia chi agatamus peri in sa strutura de is domos. Custas fiant una coghina, una domo (aposentu) de letu e unu bassu, unidos a scala de linna. Is bèstias tando biviant in pare a is de sa domo. Non bi teniat lughe elètrica nen abba in domo. Comente bassa impreiant s'aposentu de is bèstias etotu, cun totu is implicatziones igiènicas chi custu nde bogat. Totu fiat dèpidu a sa poberesa de comente biviant sa gente. A custu depimus de atzùnghere chi is ispidales non fiant adecuados e cuncordados pro ospitare gente malàida. Tando medas bias a is sanos ddi tocaiat de bìvere a su costàgiu de is malàidos, creschende s'atacu de sa maladia. A su chi narat su pianu de sa cumbata anti-tubercolare in Sardigna, presentadu in mese de freàrgiu de su 1918 s'ìsula fiat una de is regiones prus corfida dae custa maladia. Detzìdiu aiant tando de fàere interventos pro nche dda tirare. Custu interventu dd'aiant ordimingiadu peri pro Elini. In una lìtera mandada a Munsennore Virgìliu, in die de su 26 de martzu 1918 faghet a lèghere: «Is autoridades sanitàrias de cumpetèntzia, pro carchi proa, ant a isseberare sa parte orientale de s'ìsula, e a finu totu a ingìriu de Àrthana e Lanusè e, fortzis galu mègius, de Elini". |
Torrade a sa primu pàgina