Un'àtera nova amministrativa in pitzu de sa bidda elinesa dd'atzapamus in su VI Componiment de su 1358 in ue est inditadu su fogàdigu chi is biddas depiant de pagare onni annu a Berengàrio Carroz in dinare e laore in proportzione a sa rèndita e a is abitantes. Irbono e Gelui postas impare (Elini comente dda mutiant in s'antigu) pagaiant 26 Liras. In su 1363 is Carros balangiadu aiant su tìtulu de Contes de Cirra. A pustis de sa gherra intre su Giuigadu de Arbaree e su Rennu de Sardigna, sa bidda piagaiat parte, in is annos intre su 1365 e su 1409, de su Giuigadu de Arbaree. In su 1383, su Re de Sardigna «confirmadu aiat su fèudu nominale a Violante Carròs a càmbiu de su serbìtziu de 20 caddos armados pro tres meses a s'annu». Torradu a èssere inserradu a intro de su Rennu de Sardigna, Elini fiat abbarrada possidèntzia de is Carros finas a cando, in su 1511, a pustis de sa morte de Violante Bertran Carròs, su fèudu fiat coladu in is manos de is Centelles. Custos in su 1604 aiant tentu su tìtulu de Marchesos de Cirra. In su 1569, s'atzapat un'àtera trata istòrica de Elini iscrita in pitzu de una pergamena, chistida in s''Archivio Arcivescovile' de Casteddu datada in die 21 de làmpadas de su 1569. Est un'esecutòria imbiada dae su decanu de sa 'Sacra Rota' a is abitantes de dòighi biddas ogiastrinas, ca fiat a pagarent coidende puru, a pena de santziones lègias, is dègumas dèpidas a sa mensa casteddàrgia. Pro nois est importante ca est sa prima bia chi s'agatat sa bidda mutida cun su nòmene de oe: Elini. In su 1726 a pustis de unu chertu giuditziàriu longu, su fèudu si dd'aiant pigadu is Català. In su 1801 fiat coladu in manos de is Osorio de la Cueva. De comente fiat sa situatzione de sa bidda in custos annos nos nde allegat don Tonino Cabitzosu. Isse torrat totu su contu de sa bisita pastorale chi su Pìscamu de Casteddu Diego Gregorio aiat fatu in Ogiastra dae su 15 de abrile a su 4 de làmpadas de su 1800. Su pìscamu fiat lòmpidu in Elini su 22 de mese de maju. «Su 22 de maju 1800, su pìscamu aiat “martzadu” punnadu ogros a sa crèsia parrochiale de Elini, intregada a Santu Gavinu. Pro more de s'indecèntzia de sa mobìlia litùrgica, bogadu aiat provedimentos in contu de mobìlia e istruturas, lassende proa in sa cura animarum, faghende subènnere a su retore is disponimentos suos de su 29 de mese de argiolas e santugaine de su 1799 a subra de divòrtzios o bessidas de pare, is domos de is isposos, is ballos, e gasi». Leende unu giudìtziu pro comente aiant agatadu sa crèsia, podimus ipotizare ca sa bidda depiat de èssere bastante pòbera. Est de nàrrere ca in cussos annos sa crèsia de Santu Gavinu chistiat galu unu trìticu pintadu de prètziu mannu, fatu dae su pintore ogiastrinu Andria Lussu in su 1602. Su trìticu isdorrocadu dd'aiant in su 1952 cando aiant restruturadu sa crèsia, ca non si ddu crediant de meda balore. Elini s'atzapat a solu in is censimentos finas a su 1881, s'annu chi benit fratzione de Irbono.