Sa bidda

Elini est una bidda minore posta in su caminu provintziale chi cumentzat de Irbono e bessit a Àrthana. Est sa bidda prus pitica de Ogiastra, sos chi nche bivent sunt belle 550, peri chi siat una de is pagas biddas chi est creschende a abitantes. Su sartu suo, ricu de ulivàrios e èlighes betzas, tirat pro 11 ha e inserrat peri s'òasi naturalìstica de su Parcu de su Cramu. Est a làcana cun Àrthana, Irbono, Lanusè, Loceri, Barì e Tortoilì. Peri chi non tèngiat unu sartu mannu, Elini oferet meda cosa de interessu a s'istràngiu. In bidda s'agatant totu sos serbìtzios, s'apotecaria, sa posta, sa biblioteca comunale (una de sas prus frunidas in Ogiastra). Gràtzias a s'incuru de sos amministradores comunales e de sos giòvanos de sa bidda Elini si nde podet bantare de sa presèntzia in bidda de s'Universidade de Giurisprudèntzia, chi est una sede ischirriada de s'Ateneu tatharesu, unu centru de Educatzione Ambientale e una palestra comunale manna. Un'àteru singiale de sa bidda ogiastrina sunt sas funtanas mannas, chi faghent acudire gente meda dae sas biddas a làcana e probianas: Funtana Manna, e sas orgas de Su Cramu. S'abba lìmpia de Is Cannadas ddas impreaiant dae ora manna sas fèminas elinesas pro fàghere sa lissia. A càbudu totu de sa bidda b'est una bella mirada craru a su mare, chi benit semper prus bella essende a bellu a bellu bia a s'ingrujada de su Cramu. In cue est dovere a si fàghere una passillada in mesu de su padente e a abisitare su Santuàriu de Nostra Sennora de su Cramu (in Elini mutidu 'Su Cramu' ebbia). A torrare galu prus ecisosu su paesàgiu elinesu agiudat s'istatzione de sos trenos pesada a contones de granitu chi s'agatat a mesu bidda , in ue faghet galu a bìdere su 'treninu' birde cando bi colat.