Salude,

custas sunt is pàginas de su Portale Internet de s'Ufìtziu pro su Sardu de sa Comuna de Elini.

Inoghe agatade totu is informatziones in contu de is atividades de s'Ufìtziu. Amus isseberadu de iscrìere custas pàginas in Limba Sarda Comuna (sa proposta de limba iscrita ufitziale pesada dae sa RAS in su 2006), agiudende•nos cun s'allega de Elini, amostrada in is issèberos lessicales. Amus ischeddadu dae sa proposta de grafia totu su chi prus fiat a probe a s'allegare de bidda, ma medas bias amus impreadu faeddos de àteras bariedades sardas, cussientes ca sardos semus totus e totus depimus crèschere custa limba nostra che limba de cultura cambiende•nos•dda a pare.

Atividades de s'Ufìtziu

In s'Ufìtziu bi trabballamus prus de una bia sa chida, ma aberemus pro su pùbblicu su martis mangianu e merie. Si diat serbire a nos cuntatare pro chistiones linguìsticas foras de s'oràriu, mandade-nos una mail a custu inditu:

info.elini.sardu@tiscali.it

Leende un'ograda prus a mannu is atividades nostras sunt:

> Presentadas e atòbios cun su pùbblicu pro is atividades, is autores e operadores chi impreant su sardu in su trabballu e in s'arte issoro;

> Abrontamentu de documentos pro sa citadinàntzia in contu de chistiones de su sardu a die de oe;

> Cuncordu de gràficas sinnalèticas de amostrare in is atividades/ufìtzios/butegas;

> Iscrìere o bortare in sardu is comunicatziones intre comuna e citadinos;

> Ghiare una chirca in pitzu de s'allegare de su logu, pro dd'acarare a sa limba comuna;

> Trabballare a cuncordu cun Entes, Sòtzios de cultura e mascamente sa Biblioteca comunale;

> Aprontare pàginas web in sardu e bortare in sardu su portale internet comunale;

> Donare consulèntzia a sa gente pro nde ischire de prus in contu de polìtica linguìstica;

> Fàghere su Cursu de sardu. Su cursu pro is dipendentes, abertu a sa gente, dd'amus ordidu ischende ca a die de oe su bonu de is sardos non tenet peruna alfabetisatzione, mascamente in contu de iscritura. Amus a mòvere dae is informatziones in pitzu de s'istòria de sa limba e de is leges chi dd'amparant tochende a sa standardisatzione e s'impreu amministrativu de is limbas de minoria.

S'Ufìtziu e su Cursu ddos at contivigiados su Dr. Nicola Cantalupo